الله من فكرٍ من الوضع منداش |
من ما تشوف العين جاء فيه تشويش |
شيءٍ يغث البال ويضيق الجاش |
صار ابرق الجنحان مثل اشقر الريش |
ناسٍ تدرعم روسها مثل الأدباش |
وتطيح فالشعلة سواة الطرافيش |
وناسٍ على حساب المهابيل تعتاش |
ما همها من وين جت لقمة العيش |
يبدلون الزل ببساط وخياش |
وينكسون الروس مثل الخفافيش |
وان قلت ابا اصبر واترك الخبل واللاش |
عيا يخش الراس فعل الدراويش |
واللي يشيل الحمل وعظامه هشاش |
يرميه ويعود لشيل الدناديش |
الخبل لاجت لازمه هج وانحاش |
حتيش لو انه يبا الطيب حتيش |
يحسب قولة والنعم تجي بالكاش |
ويبي المسفه تمدحه بالخباشيش |
المرجله ما جابها كل غشاش |
المرجله كسب الرجال المداغيش |
كرام اللحى وقلوبٍ ابيض من الشاش |
ستر البنات منقضات العكاريش |
محمد بن شاعي الغنامي- حفر الباطن |
|
