هيه يا بيت الشعر هيه ياباني طباعه |
ياشموخ ويا آصاله ياهويتك عربيه |
يارساله ما تضيع يا براءة اختراعه |
يا حضارات قديمة يا علوم نومسيه |
يا خزامي يانفل يا ملونة شراعه |
يا سنام البيت يكفي وقفتك صبح وعشيه |
يا مفارشك الحنابل يا مرابيك الرفاعه |
يا دلال مبهرات بهيل والحمس برويّه |
يامواليفك قروم يابطاينك الشجاعة |
ياموانيسك فحول يا عناوين بدويه |
من عقب ما كان حدك ما تسوق العين باعه |
سكنوك بوسط حوش لا اساس ولاهويه |
من عقب ما كان ريحك بالغضى مد وقناعه |
باقي بالظاهر اسمك داخلك شغل حضريه |
صرت تبنى بالسطوح صار يبنيك الرعاعه |
لبسوا صدرك ورود زينوك بمزهرية |
مادام تبقى بالرسوم كل جيل وانطباعه |
ما نسوك الدهر كله صرت جلسة موسمية |
إبراهيم الزير |
|
