في وجه تركي للمراجل علامات

مير الليال القشر ما مهلت له

ما حدن يرد اقدار ربه ليا جات

أما عرضها الآدمي عارضت له

دنيا لها صولة وجولة وغارات

ان ما لحقها اللي تبي عوّدت له

الها على العالم خطوط ومسارات

هذا مصبحته وذا بيتت له

ما في شوارعها جنود وعلامات

اللي تبي بأمر الاله وصلت له

راحت بتركي في دقايق وساعات

في غفلة من كل عين اشرت له

تركي ولد ناصر زبون المهمات

لو هو صغير من الكبار اعطيت له

الها على مثله معادي وغرات

كم واحد تبكيه عقب ضحكت له

جيته على الكرسي عليه الجهازات

حزّنت من شوفه وعيني بكت له

مالي جدى الا الولوله والتنهات

امشي وانا مقفي وأقف والتفت له

وأصد عنهم واكتم الحزن بسكات

واقول أنا يا نفس وش اشتمت له

كل العباد أموات وأبوانها أموات

ما والله أحدٍ من الأوادم صفت له

سبحان من بأمره تهون المصيبات

اللي ملايكة السماء سبحت له

ادعيك بأسمك يا مجيب الدعوات

يا واحدٍ كل العباد اسجدت له

احسن عزانا واجبر ابوه بالذات

رجلٍ مواقيف الرجال اشهدت له

والله ما أبو تركي بالربع شمّات

يصلح قضاياهم ليا سنّدت له

رجلن ليا راحت ورجلن ليا جات

والمرجله من جد جده بقت له

على الرسول أفضل سلام وصلاوات

صادق وبيبان السماء فتحت له

عبدالله بن علي بن فرحان السيحاني

صفحة الجزيرة الرئيسية

الصفحة الرئيسية

رأي الجزيرة