هذه القصيدة رثاء في الأخ بدر بن سعد السقياني رحمه الله وأسكنه فسيح جناته.. |
البارحة بالقلب همٍ وهنداب |
والنوم عيا لا يطبق بعيني |
بسباب همٍ بالحشا له تلهاب |
همٍ يصد شوي ثم يجيني |
وراك حركت الكسر عقب ما طاب |
وحركت بالداخل جرحٍ دفيني |
اثنين راحوا ما لهم شكل وحساب |
يالله تثبتهم بقولٍ يقيني |
يابو بدر ذكرتني شايب وشاب |
وسبحت بالافكار قلبي حزيني |
يالله يا منزل تبارك والأحزاب |
تدخلهم الجنه مع الفايزيني |
والموت حق ولا عن الموت مجناب |
والله في خلقه بصيرٍ مكيني |
من وقفت دنياه فالباب بوَّاب |
وهذي سوات أيامها والسنيني |
ودنياك ما دامت لبوزيد وذياب |
وشيوخ نجد موردين العريني |
واصبر ورب البيت يفتح مئة باب |
والله كريم ويرزق الصابريني |
يابو بدر قم بدَّل الحزن بكتاب |
وأقر السيِّر للأنبياء المرسليني |
وصلاة ربي عد ما تايبٍ تاب |
على محمد قدوة المسلميني |
فريح بن شقير السقيان |
|
