يا الله يا جالي عن القلب الحزان

يا فارج همه عقب ما جراله

يا ناسل الإنسان من نسل الإنسان

نطفه من آدم لين راحت سلاله

يا مرسل محمد نبيه بقرآن

يهديبه اللي في دروب الظلاله

يا عالمً ما كان في كل الأزمان

والعبد لا ضاقت عليه اشتكاله

تجبر عزانا عقب فرقى كحيلان

فرقىً يطول افراقها وارتحاله

والموت حق وموعد الموت لا حان

إما وصل للعبد ولا عناله

ما هو مجنب عنه لو كان ما كان

أليا انتهاء عمره وطويت أرحاله

تدبير علام الخفاء رب الأديان

آمنت في تدبير رب الجلاله

ومرحومٍ يالي سيرته صبر وإيمان

سيرة علم حاش المراجل لحاله

سيرة تبا تبطي وهي وسط الأذهان

عند الرجال أهل الوفاء والشكاله

ذرب تعده ضمن ذربين الأيمان

ما هو من اللي قاصراتً حباله

أسأل وتلقى ذكر محسن بليهان

اللي ليا أزرينا عن الحمل شاله

اللي يسابق كل محسن للأحسان

عن ما انفقت يمناه تجهل شماله

والضيف يقلط به على مفطح الضان

والجار لو يبغى خذا من حلاله

وبالحق لو تطلب منه لين مالان

وبالحلم يحلم فوق هرج الجهاله

مرحوم يالي شالني فوق الأمتان

يوم اعتبرني واحدٍ من عياله

عسى على قبره يهلن الأمزان

وبالآخرة مسرور من زين حاله

إبراهيم بن شفاقة العتيبي

صفحة الجزيرة الرئيسية

الصفحة الرئيسية

رأي الجزيرة