ياسرع زوغات الليالي والأيام |
تمضي وحنا في شقاء الوقت لاهين |
العبد يشقى في مراتيع الأوهام |
نوب على عسر ونوب على لين |
لا هوب لا بايع ولا هوب سوام |
لا هوب لا زارع ولا مجريٍ عين |
قدم ليوم يبن الاجواد قدام |
لامال به ينفع ولابه سلاطين |
لا ينفع المحروم كثر التندم |
لا بان ميزانه برجح الموازين |
يصفق الكفين ويعض الابهام |
يا ليت لو كنا لربي مطيعين |
وين القدم أوين ماطات الأقدام |
هاجت به الأرياح ولا له عناوين |
راحوا شتات الأمس واليوم والعام |
ناس تفوز ابها وناس مساكين |
اليوم خلك صارم الرأي جزام |
لا تلتفت للي عن الدرب مقفيين |
مال عطاك الله تصدق للأيتام |
ولأرملة واللي عن الدين عجزين |
وجيران بيتك والأقارب والأرحام |
أوصل بهم ما بين حين بعد حين |
ولبوك وأمك درهم اليوم درهام |
خله إليا جتك المواجيب راضين |
أبعد عن أهل الزيغ ودروب الآثام |
ومرافقة ناس بوقتك شياطين |
الحر ياقع بالطويله ليا حام |
له ماقع عن ماقع البوم والبين |
ياالله يا منزل تبارك والأنعام |
تغفر ذنوبي يا إلهي وتهدين |
محمد بن سليمان العبد اللطيف - الشماسية |
|
