البارحه حنّيت.. لكتابة القاف... |
... طار النعاس وغردنّ الحروفي |
وقمت اتذكر ما مضى والذي طاف... |
... أيام.. راحت تستحق الحسوفي |
وهلّيت دمع من على الخد هتّاف... |
... وحاولت أوقف ثم عجزت الوقوفي |
وجتني هواجيسي على قلبي أرداف... |
... والهم في صدري يجيب الكلوفي |
الصاحب اللي راح ما عاد ينشاف... |
... وما لي جدا يا كود صفق الكفوفي |
ذاك الغزال اللي جمع حلو الاوصاف... |
... نجل العيون السود زين الوصوفي |
من يوم روّح من سبب هرج قذاف... |
... وانا طريح الفرش جتني حتوفي |
يا شوق وصلّه يعجّل بالاسعاف... |
... خله يشوف الحال عله يروفي |
انا اشهد انه مسرف فيني اسراف... |
... لا هو رهيف القلب ولا هو عطوفي |
لا قام يمشي بين هذيك الأطراف... |
... أوجس بصدري مثل طقّ الدفوفي |
ودّي على غفله ألاقيه باصداف... |
... واهديه ورد العشق من شان يوفي |
مير الزمن قاسي وانا حيل خواف... |
... يا خوف قلبي من زماني يخوفي |
لكن أبصبر واعتلي راس مشراف... |
... إلين ما ربي يجيب الصروفي |
عبدالرحمن بن سليمان الشارخ - الرس |
|
