عز الله انه مات لمطير رجال

رجَّال تحتاجه زحول الرياجيل

عبد الله العثمان للطيب مدهال

فيه الحمَّوه والوفا للمشاكيل

اللي رقا بالمجد في راس ما طال

ومن المناصب كنه الجدي وسهيل

يمتاز في جيله على كل الأجيال

دندون لكبار القضايا وحلحيل

لداره خدم باخلاص في كل الأعمال

نجح بها ماحد لقا به مداخيل

بادارته أصبح مضارب للأمثال

ياخذ ويعطي دون ظلم ولا ميل

متواضعٍ ما هو فخور ومختال

تعامله يبقى لطيبه دواليل

واليا مشى مع درب لو دونه جبال

بامر الكريم يصير قدمه تساهيل

له شيمه وقيمه ومظهر ومدخال

وله مجلس به طيبات التعاليل

مفتوح طول الوقت ما حسَّب المال

في الشحم والطيب والبن والهيل

حتى رحل والوقت نازل ورحَّال

وقتٍ يجي به جيل ويروح به جيل

ولو مات بقلوب الرياجيل ما زال

يبقى على طول السنين المقابيل

وباسم الذي نزل تبارك والأنفال

عسى على قبره صدوق المخاييل

عساه بالفردوس في خير وظلال

قولوا معي آمين يا سامع القيل

مطلق بن طالع الحلفي

صفحة الجزيرة الرئيسية

الصفحة الرئيسية

رأي الجزيرة