الشعب كله يفرح بشوف سلطان |
ويحمد الله رجعه بالسلامة |
تعبيرنا يا أمير من قلب ولسان |
ولا خير باللي ما صدق في كلامه |
كم واحد وان جاك حرج وظميان |
عليك بالينبوع وردت حيامه |
وكم واحد صعبه ظروفه ومرضان |
من المواجع ما تشيله عظامه |
ارسلت له طيارة تقل شيهان |
حتى ولو هو في اعالي تهامه |
ويوم الولي عافاه من عقب ما كان |
جسمه عليل وزايد به سقامه |
يدعو لك المعبود وان ادى الاركان |
وعند الصلاة وعند حزة صيامه |
يسلم ولي العهد له موقف إنسان |
والطيب في وجهه بدت له علامه |
معروف أبو خالد وفي كل الأحيان |
تثني عليه الناس ما من ملامه |
مواقفه تشهد على مر الأزمان |
علق بها من فوق صدره وسامه |
عز الدخيل اللي من الوقت بلشان |
كم واحد عنده تحقق أحلامه |
من عقب ما هو ما له أحجام وأوزان |
أصبح خويه تقل صاحب فخامه |
وعيش بمداته أرامل ويتمان |
يلجا له اللي جاير الوقت ظامه |
|
