عبدالعزيز اللي ولاها بالظفر

والسيف والحيلات لين احتالها

جر الجراير بالجزيرة واشتهر

سبع سبع كل السباع وزالها

نجم بدا نوره على وقت السحر

هبت هبوبه ثم شال اخيالها

هبت هبوب النصر وابليس اندحر

ونادى مناديها بروس اتلالها

انا ليا ضاقت عليّ المحاريف

ماني على بدع المثايل كتومي

اخذ على زين المثايل تصانيف

ما طاب ولا الشين ماله لزمي

خص ليا عديت روس المشاريف

في راس لحلوح يكف الرجومي

تلعب به الارياح بالقيض والصيف

بس الهبايب فوق راسه تحومي

يا من خبر واحدٍ قلبه غدا ضده

وليا بغى له طريق يعترض شانه

لو قلت ندله عن الجيران ماوده

عيّا لا ينسى غلا يا منيف جيرانه

لا والله اللي عليّه طالت المده

واعدتهم والوعد قد طاف عنوانه

صبرت لين الصبر مني وصل حده

والقلب وسط الضماير شب نيرانه

من جارتي ماملا مناظر عيوني

ولاني وانا ابو حمود قصاص جره

ولا اتابع الغرات لو اتهموني

ولاني من اللي يتبعهن بغره

خطو الولد ماص ما تلحق ملاحيقه

يزيد عن فعل ابوه وفعل الاجدادي

وخطوا الولد ما تبي شوفه وتخفيقه

يوم حصل فيه يا نياف لاعادي

الطيب سندا والاجاويد ترقاه

والله يعين بعونه المستحيني

احدٍ خذا طيبه من افعال يمناه

واحدٍ ورث طيبه من الوالديني

واحدٍ مهف مقيط بالبير ورشاه

مافيه لادنيا ولافيه ديني

لو عاش عمر شعيب بقعاء تعشاه

لا ناقص زايد ولا زاد شيني

الدر والمحار عند الغطاطيس

ولاكل من غاص البحور استفادي

ولاكل رجالٍ براسه حواسيس

ولا كل تلميذٍ تعلم استادي

ولا كل رمايٍ يجيد الملاميس

ولا كل من يركض ورى الصيد صادي

ولايامن الخايف من الخوف وينيس

وحتيش لو هو في محلٍ برادي

ولا يدفي البردان كثر الهداريس

الهمل يا نايف اليا باد بادي

والناس فيهم طيبين وهلابيس

هذا على ما قيل حسب اعتقادي

والماء على مجراه يمشي اليا ريس

الا ليا عارض طريقه سنادي

والهرج ما تجر رجالٍ مفاليس

والكذب ما ينفع خطاة الربادي

زهران عون الله المطيري - بريدة

صفحة الجزيرة الرئيسية

الصفحة الرئيسية

رأي الجزيرة