الشعر والله توّ ما جا مجاله |
معاني مثل السيوف المعاطيب |
من شاعرٍ لا قال يثبت مقاله |
مهيب بالحيلات والا الأكاذيب |
بعض المواقف واجبٍ لا محاله |
واجب على اللي يعرفون المواجيب |
قالوا مريض وقلت يا الله الشفاله |
والحزن خيم في الضلوع المحاديب |
يا الله عساه يطيب حاله وفاله |
ويا الله عساه يطيب من يفعل الطيب |
سلطان راس الطيب راعي الجزاله |
غيثٍ من سنينٍ عجافٍ شلاهيب |
لو المرض يشرى ويعطى بداله |
نشريه ونشيله بليا مطاليب |
نفداك يا راعي الوفاء واشكاله |
وحنا وما نملك فدا للمعازيب |
من دون أبو خالد وحنا رجاله |
اخلاصنا له ما يبيله تجاريب |
نسألك ياربٍ عزيزٍ جلاله |
يا عالم النيات والجهر والغيب |
فرج هموم اللي عليك اتكاله |
هذا ذرانا من جميع اللواهيب |
هذا الأمير اللي بجاهه وماله |
يا كم ويا كم من جزيل المواهيب |
هذا الأمير اللي يرخص حلاله |
لجل اليتامى والضعوف المصاويب |
هذا الأمير اللي لياجا مجاله |
حر شهر من عاليات المراقيب |
الأخلاق خلقه والوفاء من خصاله |
واليا زعل سيفٍ عطيب المضاريب |
لا ولع الموقف وزاد اشتعاله |
ولا دارت الفتنة سوات الدواليب |
سلطان مثل الضلع يلجا لجاله |
يا طى على اللي يغثربون المشاريب |
صليب راس وفيه حلم وعداله |
وشجاع قلب لا عوا الذيب للذيب |
يا الله يا ربي تمدد لياله |
سلطان سلطان السعد والمكاسيب |
أبوي وأنا واحد من عياله |
وأنا فداه بدون شكٍ ولا ريب |
عبدالله بن هادي بن القعيمة |
|
