ترسل سلامك عقب ما صرم العود |
وأمسى خريف العمر قرب النهاية |
اثر الهوى فالقلب مازال موجود |
وأنا احسب انك تايه من هوايه |
هيجت ذكرى في ضميري لها شهود |
ياشين ذكرى مالها اليوم غايه |
ذكرى الطفولة ما بها بعد وصدود |
ياليت تنساها وتنسى غلايه |
تذكر وانا اذكر ما مضى وعد وعهود |
ولاذقت كاسٍ منك يروي ظمايه |
اقفت بك الايام واصبحت مسيود |
غصبن عليك وصرت بالحب تايه |
من عقب ماشيبت ما عاد ابي زود |
ترسل سلامك رافعٍ فيه رايه |
ردي.. سلامي لك على هبه النود |
مجبور في بعدك ولا هو رضايه |
مقدر اجيك ودونك الباب مسدود |
ولاظن لو ناديت تسمع ندايه |
قلبي مقيد عن هوى الغير بقيود |
لا اقدر على الممشى ولا ارجع ورايه |
مكتوب والمكتوب ماهوب مردود |
صبرٍ على الفرقى دواك ودوايه |
عبدالله بن عبدالعزيز التويجري |
|
