ابا اكتب دام انا حي، ومعي فكر، وقلم، وكتاب |
قبل ما اروح واسافر عن الدنيا واخليها |
ابن آدم مقتفيه القبر، والحشر، وبعده حساب |
وحياةٍ عقبها مدري يا حسره وين نقضيها |
حدا ثنتين، يا جنة نعيم ومن سكنها طاب |
يبشر بالخلود وبالكرامه من سكن فيها |
أو النيران يا ربي دخيلك وانته التواب |
تجير اللي لجالك وارتجف من خوف صاليها |
نخاف اللي لهبها لو لمس جلد البنادم ذاب |
أجل وشلون لو يصبح ويمسي في بلاويها |
ألا يا الله تفتح لي من احسانك وجودك باب |
إلهي تغفر ذنوبي بعفوك وانت محصيها |
بيوم فيه ما ينفع قريب ولا يفيد اصحاب |
إليا صاب النفوس الخوف وانكشفت خوافيها |
واذا خاب الرجا بالخلق، بالخالق حشا ما خاب |
كريم العفو، والدنيا خلقها الله ويفنيها |
بدينا الرحله الأولى من تراب، ونجي بتراب |
وعسى الله ما يخسرنا بأولها وتاليها |
ضيف الله بن حمدان الدلبحي |
|
