مثل الندى رقّتك فوق الزهر صافي |
وكن الأماني تناهيدك تغلّفها |
ناعم حنينك عبير إحساسك الدافي |
(ونبرات صوتك) ترى قلبي موالفها |
الله عطاك الحنان وستره الضافي |
واعطاني اللهفة. اللي جيت أسولفها |
لو يبتسم غصنها مياس الأعطافي |
يمكن تذوب الفراشة في شفايفها |
سحر الهوى في عيونه واضحٍ خافي |
أحس في هزّته وازريت لا أعرفها |
عطره سرى وانتشا بأحلام الاطيافي |
يسبح مع النور. والنسمه يلاطفها |
تغيب عنا القمر وان بان ينشافي |
والا أنت في حسنك عيوني موظفها |
دايم ملثم وموجك فوق الأكتافي |
وخصلتك كفك وراء حاجبك ينسفها |
أرضيك وأزعل من أجلك كل الأطرافي |
تجاهل احساسها. يجرح عواطفها |
ليتك تعرف إن امانك غاية أهدافي |
واني ملاذك عن الريح وعواصفها |
خوفي عليك. وغرامي فيك متكافي |
وأصبحت أنا شاقي الدنيا ومترفها |
لأنك حبيبي. وأنا بالحب شفافي |
يكفي تقول الجروح ولا توصّفها |
فدوة عيونك. وفدوة قلبك الوافي |
(مخلص وراع الطبيعة ما تكلفها) |
خالد البقمي |
|
