كل يوم يمر للرجال يلقى فيه خيره

بفهم أكثر فالحياة ويستفيد من التجارب

ويعتبر من بعض غلطاته على رحلة مسيره

ويجتهد لو صارت أفكاره من الحيرة تضارب

ويعترف لو كانت آماله على العالم كبيره

إن بعض نفوس خلق الله تفيض من المآرب

ويكرب حزامه لياجا لازمه عرف وذخيره

مير قبل يشده يحدد بدقه من يحارب

ويتأمل فالعصور الماضية في كل ديره

من بقى فالرافدين ووش حصل في سد مآرب

هاجس عرض وانا دايم هواجيسي كثيره

درهمت عصرية الجمعة مثل سند الغوارب

ولو تجف من الظما كبدي وهي بالماجديره

قلت اخير تموت مانصيتها بعض المشارب

متعب غازي العتيبي

هاضني قاف لابن غازي يفكر دق زيره

وارقصن له من بنات الفكر صلفات المكارب

عاودن أي والضلوع نحاف والسيره عسيره

والموارد كسرة الخاطر لعصمان الشوارب

أن بدا للناس غايه فالمشاوير القصيره

قل على الدنيا السلام لكل مستعرب وعارب

مشكله لا صارت العمه على نفس غريره

تنقل الكنه ما بين الشبط وليال العقارب

كل ذكرى تلتفت لي دونها الجمه غزيره

وان بغيت انقذ غرقها كسرت مليون قارب

كل ما حاسبت نفسي من خطاها تستشيره

كنها نار (توقد) بالشتاء بين المضارب

المثل قال العمى من كان عميان البصيره

ومن نزل وسط الدمث لا يامن اذناب العقارب

حمد الأسعدي

صفحة الجزيرة الرئيسية

الصفحة الرئيسية

رأي الجزيرة