انشغلنا في مكسّرة القصيد وغربلونا

بالصحافة والاذاعة ذا مكانك ذا مكاني

ليتهم يا خالد ابن سعود ناموا واتركونا

سيّدي يا سيّدي ياكم لنا نشكي نعاني

ابلشونا شلة المكياج بالصدق ابلشونا

لا جديد ولا قديم ولا مذاق ولا معاني

ومشكلتهم لا قلوب ولا عقول ولا عيونا

جهلهم يا مير حتى بالدقايق والثوانيا

يا أمير المجد بأنواع السفاسف غرقونا

لو تغيب (أنغام) ما غابت عن الشاشة (اماني)

التراث بخير لكن زمرة اللعب انكبونا

ادعموهم ناس تجهل بالذنوب وبالحساني

بزهمك عبر الجزيرة وانت يالضرغام عونا

والجزيرة مالكه روح التقدم والتفاني

وبالنهاية بطلبك ياللي تسوق لنا المزونا

انك تكافي عبادك من بلاوي هالزماني

سعد السهلي

يا سعد ما خلقت الدنيا بلا عقل وجنونا

والعوالي ما يبين طولها غير الطماني

ما يصح الا الصحيح ولو غزونا من غزونا

والضراغم والذيابة ما تروعها الحصاني

والشعر قمة وحنا معتلينه ما اعتلونا

والقلوب المرجهنّه ثابته بين المحاني

والغناوي لو خذتها (نانسي) والا (مادونا)

الفضا واسع وكلٍ فيه يلقى له مغاني

لا تحسّك يا سعد بعض السوالف والظنونا

الشعر مبناه شامخ فوق مشموخ المباني

الزمن والله زمنا غصب لو قالوا خذونا

من عصور الجاهلية والاصالة ما تهاني

ادحم بشعرك وزاحم بالسواعد والمتونا

مكّن الرميه وجوّد لا تصيد الا السماني

هيه ياللي تمحنون الشعر قوموا واجهونا

عند حكام القصيد وعند فرّيس المعاني

الأمير خالد بن سعود الكبير

صفحة الجزيرة الرئيسية

الصفحة الرئيسية

رأي الجزيرة