اليا انتخا الجمهور ينتابها جنان |
تقلب كيان الشوط لو هي بتاليه |
قصيدة مبهّرة بالزعفران، ومتوهجة بنشوة الناموس، متفاعلة مع نخوة الجمهور وغارات شودة وهي تواصل إنجازاتها خارج الوطن وباسم الوطن.
|
عبد الله بن مجاهد العتيبي ونص من عدة نصوص وصلت الصفحة اخترناه لأنه وببساطة كان الأروع:
|
سبعة سيوف وللبطولات عنوان |
وفي كل موسم سيفها ما تخليه |
اسم سطع في عالم الهجن ثم بان |
واهل الركايب ذكرها دوم تطريه |
شوده ويعرف باسمها كل ميدان |
لا جمعوا عوص النضى الشوط تحميه |
سرداً ليا غارت كما الذيب سرحان |
تروع أهل العوص لا روحت فيه |
سمرا لها غارب ومنكب وذرعان |
فج النحر والزور ربي محليه |
بطانها لا جيب يبغالها بطان |
زود على بطن الركايب نوفيه |
حايل ولكن تسبق الحيل لا حان |
ضرب العصا والشمغ قامت تباريه |
اليا انتخا الجمهور ينتابها جنان |
تقلب كيان الشوط لو هي بتاليه |
الفعل ثابت والتواريخ برهان |
وشوده لها تاريخ محد بغاويه |
بنت الأصيل اللي فعوله لها شان |
ما له شبيه فالزوامل يحاليه |
ملك لبو نايف سلايل كحيلان |
حراً شمخ بالطيب والطيب كاسيه |
ترقاله العليا ليا قيل سلطان |
لان المعان الساميه من معانيه |
حليم لصحابه ولعداه بركان |
يمناه للعايل طريق تقديه |
للمرجله يا سيد الجود ديوان |
ما قلته إلا قاله الخلق واثنيه |
وشعب السعوديه بهالفوز فرحان |
وارض الوطن والمملكه تفتخر فيه |
صاحوا بعال الصوت شيب وشبان |
مبروك لك مبروك والكل يوحيه |
وانا عن شعوري بعبر بقيفان |
شاعر وشعري للوطن جيت مهديه |
وختامها صلوا على نسل عدنان |
اللي من الزلات ربي منجيه |
الشاعر عبد الله بن مجاهد العتيبي |
|
