عز واليك يا براق غر المزوني
غيبة الشمس براقه يلهله شعاعه
يسجع الطير ويردد عليه اللحوني
مرهي بالحيا عقب المحل والمجاعه
آه انا المغرم اللي داميات طعوني
علني ما يحللها طبيب الاشاعه
الله أقوى إلى جا الليل كثرت شطوني
كن بيني وبين النوم حرب وقطاعه
واهني لو هلي عصر الجهل عضبوني
يوم أنا جاهل سني بسن الرضاعه
عضبوني عن اللي من سببهم عيوني
من ليال الشتا ما هملجت ربع ساعه
انت الاسباب ياللي حيل دونك ودوني
كيف أبا جتلك ياللي معك روحي وداعه
انت ودك وأنا ودي واهلك عسروني
ليت حظي وحظك يرفع الله شراعه
دام قلبي بخل وانت قلبك حنوني
يا حليل الهوى المستور حب وشفاعه
اشهد انك على حالي تقول وعوني
لو تبي فوق عيني قلت سمع وطاعه
والله اني ما أخون اللي معي ما يخوني
واجد الزين لكن ماش غيرك طماعه
"مدارات شعبية"