ضاع الحيا.. والكلام الزين مادله
وجفت وجيهٍ حياها صب هماله
يا عشق الشعر، ما أحدٍ قايلٍ خله
الا ليا صرت ما انت بكاتب جزاله
يا كثر.. ناس الشعر.. والشعر يا قله
وكم واحد لو يموت! الشعر ما قاله
لا تندفع مع بريق النجم وتمله
اشوى لك البعد عنه وقربك اشواله
يا حامي الصوت، صوتك ما برد غله
لا هو يمين الصحيح، ولا هو شماله
يا هات كل الحكي.. والا اتركه كله
لا صرت ما تقدره، لا تصير مرساله
القلب ما هو بجاهل عزه وذله
لكن بعض الرجال تذلك أفضاله
لا تحطني لغز ثم تموت في حله
للصدق حاله.. وغيري له مية حاله
ماني بمن يكسب الأعجاب من ظله
مثلي الحاله، ومثله ما هو الحاله
ما شوف فالناس شخص ذم في خله
لو أنه يسب في عمه وفي خاله
ماني بمسؤول عن شرهات خلق الله
ها الوقت يا صاحبي من يحصي هباله؟
يا كثرهم لو بحاسبهم على الزله
ويا قلهم لاحسبت الوقت وافعاله
قل الحيا.. والحديث العذب ما عله
ويا ليت بعض الوجيه، يكف هماله
"مدارات شعبية"