يا سعد وش شاف مجنون ليلى بالغرام
أشهد أنه وإن بلي بلوته يا هونها
يا سعد ليلاه وإن مات فيها مستهام
تدري أنه بالهوى يا سعد مجنونها
المصيبة من غدى ميت له كم عام
عشقته ما تدري أنه قتيل عيونها
قرهدت نفسه عليها ومر الكبد زام
ودوك قلبه يا سعد مزعته طعونها
يا سعد راع الهوى بالهوى لا ضيم شام
ما يرده طول بيبانها وحصونها
وإن غوى راع الهوى في هواها ما يلام
لا اجتمع غبن الزمن يا سعد وغبونها
يا سعد هي منوة اللي تمنى والمرام
مات أبوحظ قصر يا سعد من دونها
اسمع الرعاد واخيل براق الغمام
بس ما ادري يا سعد وين وبل مزونها
يا سعد والله فلا أسلى هواها لا حرام
لو يلوح الشيب في لحيتي وقرونها
وخذ وصاتي يا سعد وصله بنت الحشام
ذي وصاتي كان غيري غدى مظنونها
لاشرت ثوب الفرح تشتري لي بوع خام
يدفنوني ليلة العرس ويزوفنها
"مدارات شعبية"