من سبب رمشها الضافي ونعاسه
هيه يا بايع الدنيا وما فيها
شفت حالي شبيه مضيع الطاسه
أوحي السالفة ما كني أوحيها
من عنا قلب مغليها لهوجاسه
يتعب القلب لا من حل طاريها
شيدت بيتها الشامخ على ساسه
عوج الأضلاع ترفعها وترخيها
حبها بحر يغرق فيه غطاسه
وشوقها علة يتعب مداويها
أتخيل غلاها يلفظ أنفاسه
واحتوي حبها الماضي وأداريها
مشكلتها لبعض الشي حساسه
تدري إن كل نظراتي تناديها
بس ما تدري ان الروح محتاسه
والدمار انتشر في قلب مغليها
قلبي اللي مع العالم قوي باسه
يدعي الله على شانه يخليها
"مدارات شعبية"