الوقت يجبرنا على بعض الاشكال
يعني علي ما قيل من شان حاجه
ظروف مايبلا بها طيب الفال
كم طيبٍ أصبح بعنق الزجاجه
يصول قبل الوقت يدبر ويختال
قبل الظروف وقبل يكثح عجاجه
أيام ننزل بالوطا كل منزال
ما همنا صوت الردي واحتجاجه
خبل سواليفه عريضات وهزال
ما بين قطع السالفه واللجاجه
يا كثرهم يا حسين لو قالوا ارجال
اشناب ما تكفيك وقت المواجه
اقول يالصاحب ترى الوقت ميال
تغلي قراحه لين تشرب هماجه
دنيا تلاعبنا على كل منوال
تضيقيبي لا قلت شفت انفراجه
مصايبه دايم كبيرات وثقال
عسى الخيال يجودلي في علاجه
لا شفت في عين المقادير الاهوال
ارسم على وجه القصيد ابتهاجه
انسى الهموم وطاري القيل والقال
واعرض عن علوم الغثا والسماجه
حط المبادي والقيم ضمن الآمال
وسوق الردى لا تنخدع في حراجه
ما هي جديده قالها ناس واجيال
والطيب مهما كان يلقى رواجه
لو سولفوا بك يافتى الجود جهال
علمك بنى قصره وجود سياجه
ولو غرتك دنياك في بعض الأشكال
مكشوف لو غرك بضحكة احجاجه
لأن الليالي ما تخليه رجال
غصب عليه يبين وقت المواجه
"مدارات شعبية"