يا هجوسي لا دعيتك خابرك مطواعه
كل ما هب القصيد وزان لي طاروقه
شاعرٍ لا قال شعره صفقوا لإبداعه
وشاعرٍ ما ودَّك إنه يبتدي منطوقه
وما يخون أن قاله الله شاعرك مرماعه
كيف وشداد المعاني مستريح فوقه
يرتفع غصن القوافي والمعاني قاعه
لين يربى في فضاه وينحني بعذوقه
وكل ذيب يا هجوسي عيشته بذراعه
ولك عليّه كل معنى لا أطعمك معلوقه
والهنوف اللي بلحظة موّلدك طماعه
غنّ فيها يا قصيدي لين يروى شوقه
حسنها يا مر وينهي في جميع أوضاعه
كنها بس لعذابي والشعر مخلوقه
لا تلعثم قحويانه هب لي نعناعه
وش أبا آخذ وش أخلي كل شي بسوقه
كل ما عز القصيد وطق لي بصباعه
يعتزي له كل بيت وينتخي بطروقه
هو يمون وكيف لا سهب في حديث وساعه
والله لياخذ حياتي فوق كل حقوقه
له عليّه كل معنى للولي والطاعه
جاد وقتي شح وقتي حالف ما بوقه
يا عذولي والله أنك لو تعرف أطباعه
كان ما تنفخ هواك بقربةٍ مشقوقه
والله ليبطي بصدري تحتويه أضلاعه
والعمى ليله طويلٍ لو يتم شروقه
"مدارات شعبية"