جيت لهفة سؤال ورحت لوعة إجابة!!
واكتفيت بضياعي بين جمع الحروف
جيت أسولف وأتابع في سطور الكتابة
جيت بين العيون أشباح تنبي بخوف
ارتضيت الملام ولو ذبحني صوابه
قلت (آهٍ) ولكن (آه) ضربة سيوف
العزيز (الذليل) ولا يضاها جنابه!!
أمطرت من سماها النجوم (بكسوف)
جيت دمعة يتيم بنظرته ما تشابه
ما لحقها ملام ولا لحقها حسوف
جيت (وجهة) مسافر ما طواها سرابه
جيت لحظة زمان ما شكتها الظروف
بين ضحكه (ودمعة) والرحيل وعذابه
ماتت (أهلاً وسهلاً) في زمن ما يروف
صاح فيني منادي والبقا لا نهااابه
وانتبهت لجنابه.. ولجنابه ظيووف
ما كواني زماني وانكويت بجنابة
ولّ.. كنه بذبحي يا طعوني شغوف
ما قطعت البحور ولا رميت بحسابه
لا نظرت الوجيه ولا لمست الكفوف
من طعني بخنجر ما شكيت الإصابة
ما لقيته حقيقة - ما رسمته طيوف
ما كتبني حضور - ولا مسحني غيابه
لو رمى (نور عيني) في ظلام يشوف
"مدارات شعبية"