مسكين يا قلبي العنا كيف ترتاح
وشلون يهنى من يفارق خويه
عقب السعادة والوناسه والافراح
صارت حياتي عقب خلي شقيه
ثورة غضب جابت لي الهم واجراح
وانشهد اني معترف بالخطيه
فارقته واليوم معها السعد راح
دنياي قفري بعد خلي خليه
لا حل طاريها وفي خاطري لاح
رسمه بغز القلب تسمع دويه
أخذ القمر من وجهها نور وضاح
ولارض منها تأخذ الجاذبيه
والعطر فيها دايم الدوم فواح
معذور لو سميتها المزهرية
احبها غصب على كل نصاح
وارخص حياتي لحل عينه هديه
يا هل الغضى لا تشهروا سيف ورماح
وفي وجهنا.. واسعوا لحل القضية
انتم هلي وأن لكم درع واسلاح
روحي فداكم لو نذوق المنيه
بس ارحموني واتركو الهم ينزاح
عني وعبراتن بقلبي خفيه
ردوا لي اللي لجلها خاطري ناح
نوح اليتيم اللي يهينه وصيه
"مدارات شعبية"