إلى متى وأنا انتظر لوعة الياس
اشرب فناجيل الجفا يا حبيبي
ملت عيوني من سهر ليل الاتعاس
شفا دمع عيني صار كله سريبي
لا أقفى النهار أحس ضيقة بالأنفاس
وأون ونات الكسير الصويبي
وأصبحت في بحر الهواجيس غطاس
وأجلس بوسط الناس كني غريبي
فكري تشتت والعقل فيك محتاس
ما تعرف إنك طب قلبي طبيبي
فيك المعاني كاملة دون مقياس
حس ودلال وطيب واصل عريبي
ارفق بقلب دايم الدوم حساس
يرجي وصال فاقده يا نصيبي
حبك بنيته في حشايه على ساس
بأقصى خفوق فيه جرح عطيبي
دايم على راحتك يا زين عسَّاس
واللي تريده يا حياتي نجيبي
يا جوهرة اخترتها بين الألماس
ظنيت بك ظن عسى ما يخيبي
ترى الهجر والصد ما هو بنوماس
ولا تحسب انك في قرارك مصيبي
ارجع حبيبي يا بعد كل هالناس
ارجع قبل شمس المحبة تغيبي
"مدارات شعبية"