أقبل علي من شمال أروى عيوني والمطر ديم
وجهٍ علي طل كن العيد في طلة جبينه
أقبل وأنا أخايله ظامي مثل ما خايل الغيم
ماني مصدق على شوفه وأنا عيني بعينه
أسقاني الشرف لا والله وغير الشرف تسليم
سلم بصوته وانا ودي سلامه في يمينه
من قبل أفوز بهكا الطلة وانا أيامي مجاهيم
في ذمتي كل يوم فيه ما شوفه غبينه
واليوم جتني به القسمه هلا باغلى المقاسيم
ما كان وقتي معود في هداياه الثمينه
نورت يا ضيف عمري قبلك أيامي معاتيم
وتبسمت باقي أيامي وهي قبلك حزينه
غنمت شرفك على ما قيل هالدنيا مغانيم
ماهي من العمر ليلة عاشق سامر ظنينه
خذني عن الكون في هاك العيون آسج وآهيم
وافهم بها اللي جميع الناس ما هم فاهمينه
أقراك واكتبك وازعل منك واسترضيك تعظيم
وارافقك في فصول البر وفصول المدينه
وافرش لك الدار ورد وكل ما تسمع ترانيم
واقلطك في وسط قلبي وتنزله السكينه
أنا أسعد الناس وانت أغلى المعازيم
لكن حبيبك إلى سافرت جعل الله يعينه
ليت السنه ما تجينا في لياليها المقاديم
والعمر وياك لا تكبر ولا تصغر سنينه
وانا بعيش لهواك اللي يصحيني وان نيم
وأدلك في حياتي وانت ربان السفينه
يا مرحبا من مشيت وكل خطوة منك تكريم
الله يبارك بيوم في قدومك محترينه
دخل حياتي بصمت بلا احتفال بلا مراسيم
وجه علي طل كل العمر في طلة جبينه
"مدارات شعبية"