Al-Jazirah

كيف كنا؟! كيف كنا؟!

كثيرون أصدقاء الطفولة بصدقها وبراءتها، ما أجمل أن تلتقي بأحدهم وتسترجع الذكريات ولكن تعده ويعدك باللقاء مرة أخرى ولا يحصل؟

بعد ما غبنا شهور وعدة سنينٍ طويلة

اجتمعنا والليالي يجمعن ويفرقني

قلت حيَّ الله صحيبٍ ما هقيت ألقى مثيله

مار طمّني عساك بخيرْ وسرورْ وتهنّي

قال راسك للبقا يا راعي اليمنى الجزيله

واحمد الله كل شيء بخير والفرحة تغنّي

حط يمناه بيمنى راح يحكي واحكي له

واستعدنا ذكرياتٍ ماضيةْ ما يرجعنّي

قال تذكر كيف كانت أول الدنيا جميلة

قلت اه يالطفولة بس وش نفع التمنّي

كنت انا وياك صحبه ما بها كذب وختيله

كل ما شفنا بعضنا شويّ والاّ نستجنّي

كنت لاجيت الفصل والقاك قدامي تجيله

قلتْ بكره غير اجي قبلك وهاك العلم عنّي

يعني هو بسْ انتْ اللي صاحْبك دايمْ تحتريله

مثل ما قلبك يحن لشوفته قلبه يحنيّ

دومْ نمشي مع بعضنا والجفاوة مستحيلة

تضحك ليا شفتني واضحكْ ليا شفتكْ بسنِّي

من لمحنا قال ذولا اخوانْ من نفسْ الفصيله

حتى بالفسحة نجي لاحلامنا الزرقا نبنِّي

أنت تبغى تصيرْ ضابط لك كانْ ولك فضيله

للوطن تبيع روحك وانت قلبك مطمئنّي

وانا مثلك نفس هالغايهْ وهي غاية نبيله

بس كنت اطمح اصير اديب وأيامي حدنّي يالطيف يالوقت صارْ جروحْ وهمومٍ ثقيله

وين ما وجهت رجلي ما لقيت الا التعنّي
انت مثلي في شعوري ولاّ انا حالي عليله
قال والله غير تعجب لو همومي بيَّننّي
التغت كلمة محبة صارت الفرحة قليله
كمْ وكم رجالْ عايشْ مادِرِي به لو يونيِّ
الفلوسْ اغوت قلوبٍ ما عرفت معنى الرذيله
صارْ كل انسانْ يلهث للحياة ولا يكنِّي
نوبْ ابن عمك تشوفه ما يشوفك في سبيله
شاقيْ بدنياهْ يركضْ لا ركاد ولا تأني
لين حتى الجار ما ندري هو من اية قبيله
ساكنينْ سنينْ كلٍ وسط بيته مستكني
قلت ذي فرصةْ سعيدة جمعت خلْ وخليله
خاوني للبيت لكن قال هاك العذر مني
والله اني منشغلْ واسمحْ ترى مالي وسيله
بس دق الرقم هذا لين جوالي يرنّي
قام اضاف الرقمْ عنده قبل ما يعلن رحيله
وقال لازم نلتقي في موعد ما به تونِّي
واسمه مخزن بجوالي عزاي وعزتيله
ضمن اسماء مسميها يوادع ما يثني
لا اتصلت ولا تصل بي وعادت الغيبه طويله
لكن أقول الليالي يجمعن ويفرقنِّي

شعر /سلامة عواد العنزي