جعل براقٍ ينوض وشاح قِبْله
كن ينهت راعده واذكر حزوني
لا غشى نجد العذيه هل وبله
لين يورق عودَها واملا عيوني
ديرةٍ لو شرّع القاسي بنبله
حبها بين المهد وأبيض كفوني
يمها حي القصيد ومن تعب له
خاطرٍ عمسٍ مواريده شجوني
وين من جرحي على الموعد حسب له
لين فارقت الربوع وفارقوني
يا هفيف عصير وان ميّلت جب له
زفرتينٍ طيّحت باقي لحوني
مرهفٍ سج الخفوق وقلت ذب له
ما تمثنى إلا المطر محيي غصوني
والله اللي مدّ له واللي وهب له
وان نسيته ما ذكرت الا طعوني
وادعجٍ جزّ الزمن حبلي وحبله
وانقطع وصل الرجا دونه ودوني
ما اذكره غير انتحب لي وانتحب له
كني اكتب عبرتي وامحي جفوني
اشهد ان في روح من بُعدك وجب له
حسرةٍ للحشر يا ضاف الردوني
مير ما للرجل غير اللي كتب له
وادري ان الله كتب باقي شطوني
وفي مان الله وان نوّيت قبله
يا عيوني كان ما عميت عيوني
"مدارات شعبية"