يا من عليها سماي مغيِّم جوّه
والنوم لي وقت وعيوني مفارقها
جمر الغلا جوف صدري ما خبا ضوّه
والعين دمع الوله والشوق مغرقها
برق الأمل لاح .. لكن ما صدق نوّه
بالغيمه اللّي جذبني نور بارقها
يا ليل ما أطولك درب المغترب توّه
وجيوش الأيام صكتبي بيارقها
الهم قلبي بكمه عاقد الخوّه
ومياسم الوقت واسمته مطارقها
فرقاك طالت وزادت بيننا الهوّه
واليوم بنت الأمل شابت مفارقها
صبرت كلّه وفاء وإخلاص ومروّه
البال مشغول والأعصاب محرقها
يا قلب زلّك ليا زل الوعد طوّه
نوافذ الوقت لا تقعد توايقها
ترى الغلا قود .. ما هو سوق بالقوّه
وبعض الأماني سنين العمر تسرقها
لا يستثيرك حكي شمّات ومفوّه
وكثر الهواجيس فج الصدر واعتقها
قلّه على راحتك واللّي تبي سوّه
ما فيه داعي قلوب الناس تدرقها
ولا يغرك اللّي نباه ألفاظ محلوّه
ولا كل كلمه ليا قيلت تصدقها
العشق بحره يدير الراس ويتوّه
كم عالمٍ غرقت بجوفه زوارقها
"مدارات شعبية"