وش بقى من الدمع يا سهوم المنايا
لاعْتراض وطعنتك جت حاتميه
صوبتني لين بيحت الخفايا
وخْطفت زهرة حناياي النديه
هزت الخاطر وسوت بي سوايا
ضيعتني بالدروب السرمديه
روعتني في مهند في غلايا
في عيوني آه يا سهوم المنيه
ما ادري انزلته بقبره من حشايا
والا هو قلبي تبعثر من يديه
والله اني قمت اردد من عنايا
واهني الموت به لا واهنيه
تو عمره عام يارب البرايا
رحمتك يالله تهونها عليه
انت من يعطي وياخذ والعطايا
منك يا ربي ولك تبقى العطيه
آه يا مهند ياكثرك فالحنايا
ازهرت فيك الضلوع الجرهديه
صورتك تسبقني لكل الزوايا
ما تغيب وجمرتك بالروح حيه
رحت عني بس باقي لك بقايا
وانت لك في كل ما فيني بقيه
كيف ابنسى ضحكتك لي والحكايا
في خيالي والهواجيس الخليه
رح بامان الله عليك ازكى التحايا
للكريم الفرد خلاق البريه
اللي في رجواه ما يقطع رجايا
لا ترجيته عظيم المقدريه
يشفع ويغفر ذنوبي والخطايا
يوم لا ينفع خوي مع خويه
"مدارات شعبية"