هذا أنا وهذي حياتي بلياك
ضايق وشاقي في زماني وحاير
ميت من بعادك وأنا ميت أبغاك
وارد حسره وتغديبي حساير
سرت بي أوجاع الزمن بعد مسراك
تكونت واستوطنت فالضماير
على رجاك وفالدروب اتحراك
ليتك تجي وتشوفني كيف صاير
في كل شي أشوف زولك وذكراك
واشوف وجهك كلما شفت زاير
شلت العزاير كلها بعد فرقاك
معقول ترضى لي بشيل العزاير
حتى العباير تنسكب لك ترجاك
شفت المذلة كيف حتى العباير
أثور لاجابوا مجالك وطرياك
والا انت اظنك لو اجي منت ثاير
أشوف جورك واتشفق على أعداك
الله يعين اللي تجي معه جاير
أسرار قلبي معك ما عاد تخفاك
كشفتها ما عاد فيها سراير
وقتاً قضيته بأجمل العمر وياك
بدلته الفرقا بشي مغاير
واقف وأشوف الكون داير والأفلاك
وأثرك بوصلك داخل الكون داير
اللي لو تموت بترجيه ما جاك
ما هو بحاصل بالمكر والمساير
وانته غديت وبالهجر قلبك اغداك
ياشين زرع الطيب في قاع باير
وهذي حياتي معك والا بلياك
ضيقه وتشتيت وهموم وعزاير
"مدارات شعبية"