تثيرني أحيان وتهز الأعصاب
توقف على كلمه من اللي أقوله
تبني عليها حجّتك لوم وعتاب
ولاّتعديها بيسر وسهوله
يغلب عليك الشك والظن غلاب
الوهم يطغى والصراحة خجولة
ماكننا وياك أصحاب وأحباب
خذنا بدنيا الحب عشره وجوله
ما للزعل ما بيننا أي أسباب
ولا الهجر غاية ومقصد ننوله
ماني أنا وياك عن بعضنا أغراب
لو طال أحدنا شيء الآخر يطوله
حنا بشر مخلوق من طين وتراب
والكل منا له هواه وميوله
الصبح واضح ما نغطيه بحجاب
والليل داكن لو فوانيس حوله
والسيل بالوديان لو زاد جذاب
والسفن تغرق لو تزيد الحموله
حكي العواذل ليه نحسب له إحساب
وليه نرجع بالعقل للطفولة
"مدارات شعبية"