يا قلم ما فاضت أشواقك ولا هاضت شجونك
خذ من اوراق القصيد الطارفه لا تحتريها
امتلا قلبك غرام وناحت الفرقا عيونك
واعذاب الصفحة البيضا إلى ما دجت فيها
سج راسك مع صحاصيح الورق وازعج لحونك
خابرك ما تقصر الشرهات دون اللي تبيها
يا نحيل العود يا عزي لحالك من شطونك
سيرتك في دفتر الأشعار ماني منتسيها
لك مواريد اليا من جف صدرك ما تخونك
لا سريت تزخرف الافكار يا عيني عليها
ان تخاوينا على بيض الورق كفي زبونك
ذيك نلقاها على الحروه والأخرى نقتفيها
لا طعنت الشاردة والواردة مكن طعونك
لين يشرب من معانيك العليل ويرتويها
عش على وجه الورق وافي ولون الصدق لونك
والسطور اللي توردك الملامه لا تجيها
روض العاقل على حرفك وهو يقرا جنونك
والمحابر وان تلوث حبرها لا تشتهيها
خل هقوات الصدور الممحلات تطيح دونك
شف عروس الشعر واكحل عينها وانقش يديها
"مدارات شعبية"