جاني الخبر في موت برجس فجيعه
قلت أشهد أن الموت روّح برجال
وضاقت بي بموته مجوج الوسيعه
وأصرخ بعال الصوت والدمع همال
على الفقيد اللي وفاته شنيعة
يمرض بها الطيب بلا شك وجدال
مير القدر لا جاء سهومه سريعه
آمنت بالخلاق بيديه الآجال
مرحوم يا خالٍ فعوله شجيعه
أعتز به وأفخر ليا قلت يا خال
اسمه وفعله معتلي بالطليعة
نادر مرار ومعتلي راس ما طال
عدم الرجال اللي حصونه منيعة
في سوق فعل الخير مداته جزال
نبع الضحا ساس الوفاء له طبيعه
لو مات يبقى اسمه على الطيب ما زال
الواصل الوافي بنفس رفيعه
وقلبه صخر ما به من الخوف مثقال
له وقفة بالصيف تشرق سريعة
في حزة الضيقات يلقى بها ظلال
عز الرفيق اليا شكاله هزيعه
درع على اللابه ولعداه سلال
يا رب يا خلاق عبدك سميعه
أرفع لك يديني وأنا كلي آمال
عساه فالجنة يجاور شفيعه
في الجنة العليا وفي خير منزال
"مدارات شعبية"