يا قصر وين اللي زهت به مبانيك
وين الذي يفرح ابشوفة ضيوفه
وين الذي بالجود والعز راعيك
من به لخلانه وربعه مروفه
ويا جار وين اللي يعينك ويغليك
شيخ الرجال اللي بفقده حسوفه
راع الجميل اللي الى انضمت يحميك
يبعد عن المضيوم ذله وخوفه
بالجاه ما يبخل وبالمال يفديك
لاجلك ومن شانك يحمل الكلوفه
مرحوم ياللي طيبات هقاويك
وعزايمك ما ترتضي بالنكوفه
تمضي إلى أهدافك وسامي مراميك
زينك تبيه. وما يشينك تلوفه
عداك عما يشتهونه أعاديك
اكفوفك اللي ما تعرف النشوفه
الجود طبع لك وفزعتك تعطيك
شهادة عند الجميع امعروفه
شهادة في محفل الفخر تعليك
ومن نافسك تسمو عليه أو تنوفه
الحمد لفظ وكل معناه يعنيك
الله يدري والخلايق تشوفه
وياقل من هو بالمراجل يباريك
مثلك قليل ونادرات وصوفه
ويا والدي والله مانيب ناسيك
وشلون ينسى اللي سحاب اكفوفه
يرحمك ربي كل ما حل طاريك
وعساك عنده من أفاضل اضيوفه
وعساي واخواني بعدن نوافيك
بروض جميل دانيات اقطوفه
ولعل زوجاتك معك في مغانيك
في جنة ما به عذاب وكسوفه
وصلاة ربي عد ما قيل لبيك
على النبي اوعد سبع نطوفه
"مدارات شعبية"