هذا العمر يقفي وأنا أقول توّه
وهذي جروحي مثل ما هي معاطيب
وليل السهر في محجر العين ضوّه
مدهال دمعٍ شفت منه الأعاجيب
(وجه الزمن) في عين مثلي تشوّه
وشلون أبحيا في زمان الأكاذيب
واللي مثل حالي صديقه عدوّه
ماله سوى (طرق القوافي) أصاحيب
أنا وشعري صحبة قل: أخوّه
(عشرة عمر) يفخر بها راعي الطيب
أبني بشعري حلم صعب بعلوّه
وأقول أنا قده لو أتعبني الشيب
وأقهر به الحاسد ليا من تقوّه
حلمٍ ربي بين الضلوع المحاديب
أدري بأن الحب ضعفٍ وقوّه
وأنا على شانه تغربت تغريب
أمشي على شانه بطيب ومروّه
وأحسّب أخطائي وأداري عن العيب
ولو قيل عمرك راح أنا أقول توّه
توّه ولو كلي جروحٍ معا طيب
"مدارات شعبية"