أستاهل اللي صار لي ليه حبيت
سجنت نفسٍ قبل كانت طليقة
ما صار صار وواقع ولو تمنيت
ولا عاد باقي غير جرح الحقيقة
مفروض من باب الأدب والإتيكيت
لاجيت تبعد تلزم أفضل طريقة
مهو كذا طقق براسك وحديت
مبسوط واللي هام بك في حريقة
إن كنت مخطي قولي ويش سويت
عاتب عتب عاشق يعاتب عشيقه
يا زين علمك يوم جيت وتغنيت
قال أيش قال لكل شخص طريقة
في ظاهرك حي وفي داخلك ميت
قاسي مشاعر والملامح رقيقة
هقيت بك يا ليتني ما تهقويت
أجل تزيح أحلام عمر بدقيقة!
على العموم أخطيت لكن ما أخطيت
المخطي اللي شال ما لا يطيقه
لكن على أية حال أبقول لك بيت
فيها المعاني جلها والدقيقة
(أبيك تذكرني ليا منك أقضيت
وطريقتك يا شينها من طريقة)
"مدارات شعبية"