اشتقت لك والقلب توه مودعك
لحظة غيابك أشعلت فيني الشوق
بلحظة وداعك كنت تخفي مدامعك
عني ودمعك تفضحه لمعة الموق
وتقول بكيّتك وأنا كنت أدلعك
أيام تمضي والهنا معك ملحوق
يا غايتي والدمع ينزل وأنا معك
بساعة صفا ما كدر الصفو مخلوق
لا من تذكرت السفر قمت أطالعك
ودمعي يسيل ويرسم بخدي حروق
كيف يتحمل خافق دوم يتبعك
لا غبت كنه خارج الصدر مسروق
لو كنت أقدر كان بيديني أمنعك
وآخذ عليك العهد ثابت وموثوق
عشت الهوى والحب باجمل مرابعك
حب زرعته أثمر نخيله عذوق
وأسقيتني حبك من أعذب منابعك
يا خير من يمشي على الأرض معشوق
تسمو بأخلاق الرجولة وترفعك
عن الدنيا روعة الخلق والذوق
يأسر كلامك لب عقلي وأنا اسمعك
والحكي عندك له مفاهيم وحقوق
آخر لقا كانت همومك تصارعك
ذاك المسا والجو أمطار وبروق
تضحك ولكن زفرة الهم تمنعك
وتصد عني وجهك تناظر شروق
يوم السفر هلت دموعي وأنا معك
دمعة عيون خلفت فيني حروق
قلب حرقه الشوق لحظة موادعك
واشعل غيابك داخله لاهب الشوق
"مدارات شعبية"