جات الإجازة بعد وقت الدراسة
وكل يحصد اللي زرع يا سليمان
اللي بذر في الأرض وأسقى غراسه
يجني من الأثمار خوخاً ورمان
واللي زرع في قاع صبخاً يباسه
ما تثمر أشجاره ولا هو بربحان
هذا مثال وشوف فارق قياسه
واضح لكل اللي يشوفه بالأعيان
اللي نجح يجني السعد والوناسه
وكل يرحب به ليا زار الأوطان
إن قيل ناجح قيل يا حي راسه
من يبذل المجهود يجزى بالأحسان
واللي رسب يمشي دروب التعاسه
ويندم على التفريط في كل ما كان
اللي نعس يلقى نتيجة نعاسه
طول الإجازة يحتري دوره الثان
الرجل منضوره يبين مقاسه
ينظر على قمة كرى طول الأزمان
وحنا مشينا قبلكم في العساسه
ما ننزل الا في ربيعٍ وريضان
ستة عشر عاماً مشيت الدراسة
في اربع مراحل ما تريضت عجلان
نلت الطلب وأخذت في الوقت كاسه
كله بتوفيق الولي عالي الشأن
وامشي مع الطيب وعندي سياسة
ما مشي مع الرديان وفلان وفلان
لان الردي ما فاد معروف ساسه
حتى ايش لو يضحك معك بعض الأحيان
يبين لا جيته بحاجات ماسه
وتندم على ممشاه وتزيد الأحزان
خلك مع الطيب وراع الفراسه
تنومسك خوة طويلين الأيمان
وابغا طموحك منصب بالرياسه
وتصير مضرب للمثل يا سليمان
والهقوه اللي فيك تعطي حماسه
لنك معرب يا سلايل كحيلان
وأختامها كل يبي شرب كاسه
أحد شرب وأحد من الوقت عطشان
"مدارات شعبية"