قصيدة في رثاء العم عبدالرحمن العقيل رحمه الله تعالى
مرحوم ياللي كل ابونا فقدناه
العايله كلّه كبير وصغيري
مرحوم ياللي باسطٍ كف يمناه
بالوقت هذا والزمان المغيري
عمي عسى الجنه مقره وسكناه
الله يجيره عن لهيب السعيري
يارد على حوضٍ عبادك تمنّاه
حوض النبي.. يشرب من أحلى غديري
مادبّر الله في عباده رضيناه
ذي سنّةٍ ما عن لقاها مطيري
عسى السحايب فوق قبره يجي ماه
تسقيك ياقبرٍ غطاه الحفيري
يصير روضٍ من رياضٍ منصّاه
وبالورد والريحان لبسه حريري
يبكيك طرفٍ حر دمعه تغشاه
ويبكي على فقدك كبير وغريري
تبكي سليل الطيب في كل مثناه
زبن اليتيم المستحق الفقيري
حنت لأبو خالد دلالٍ مسنّاه
والمجلس اللي شاف فقده عسيري
لأجل الكرم والجود نفسه معنّاه
والطيب دربٍ فيه ما يستشيري
يابا المراجل كلها والحميّاه
دايم على الفزعات دوره كبيري
يرحمك ربي عد دمعٍ سكبناه
واعداد ماهوجس بفقده ضميري
وصلاة ربي عد حرفٍ ومعناه
على النبي الهاشمي البشيري
"مدارات شعبية"