يا الله أنا طالبك يا رب يا والي
يا غافرٍ للذنوب وقابل التوبة
إنك تخفف هواجيسي وغربالي
وتعين قلبي على همه ومكروبه
البارحة كل حلم لاح في بالي
رغم أن الأحلام في دنياي محسوبه!
(يا أمآل عمري) وش اللي صاربي تالي
الحظ قصّر ووقتي بانت عيوبه
اللي أبيه بحياتي ما تهيالي
تعبت أنا أبني طموحي طوبة وطوبه
اللي إنكتب لي شقى روحي وترحالي
مؤمن وأعرف إنها أقدار مكتوبه
بس إني أكذب على الناس وعلى حالي
وأنا أدري إني أعيش بشبه غيبوبة
أجادل الحظ ولا به فود بجدالي
والناس كلَِّ وصل كيفه ومطلوبه
إن قلت ماني ميالي ماني مبالي
لا شك نفسي عن الزلات محجوبه
يا رب ترحم كثيرين الشقا أمثالي
وتزين حظوظ خلق دوم مقلوبه!
"مدارات شعبية"