يا هاجسي رتّب جديد الطواريق
رتب جديدك طاب نوم الخلايق
وين البيوت اللي تجيني مسابيق
وين الجزال الوافيات اللوايق
السالفه ما هي بلحية تعاليق
ولا عاد هي لحية علومٍ روايق
احاول افتح بالهجوس الصناديق
لعلّي القى لي حلول وطرايق
لحظات اروق وباقي الوقت في ضيق
لا قلت هانت جد بالأمر عايق
لا شفت مزنٍ مثل لون الغرانيق
مرات افوق ونوب ماني بفايق
اخيلها وانا ارتجي بلّة الريق
واشوف شوقي للحيا فيه شايق
وتمطر بنارٍ تشتعل بالمعاليق
يسوقها من طيحة الحظ سايق
وتصبح مقاديم الوناسه مدانيق
والصدر من زود العنى دوم ضايق
العين تشكي من فراق المطاليق
اللي لهم فكري على الدوم تايق
فكّاكة اللي مبهمات المغاليق
اللي من صدوف الليالي غلايق
يا زين جلستهم وصفرٍ مفاهيق
والجو كايف والسوالف حقايق
لا يا بعد ناسٍ خفاف مطافيق
ناسٍ على بعض السوالف شفايق
ناسٍ تعيش أيامها بالتلافيق
ومن بين خلق الله تشب الحرايق
بالمختصر ما هي بلحية تعاليق
ولا عاد هي لحية علوم روايق
"مدارات شعبية"