قمت أتذكر لحظة في زماني
عساي اخفف من لهيب كواني
الليلة اللي عالقة وسط ذهني
وشلون أبا انساها واساير زماني
صادفتها من دون سابق مواعيد
وأخذت ساعة واقف في مكاني
ابهرني الموقف وضاعت علومي
ولدري وش اللي صباني وابتلاني
حسيت باحساس غريب عليه
ما فيه مرة في حياتي لفاني
وتزايدت دقات قلبي وعيني
ما عاد ترمش لين حبه براني
ضاقت علي الأرض واهيه وسيعه
ما غير ادوجبها وافكر واعاني
ومن بعدها والحال واشيب عيني
أعد ساعات الزمن والثواني
النوم عيني ما تذوقه دقيقة
تسهر على ذكرى الليال الفواني
أمر غريب ما هقيت يتكرر
حتى ولو أن القدر ما عطاني
ويبقى محله وسط قلبي امفرغ
ما يحتمل غيره ولا شخص ثاني
"مدارات شعبية"