شكلك يقول إنك كذا ما تبيني
خايف ومتردّد وواهم وندمان
لا يا بعد كلي ويا نور عيني
ما ضاعت الشيمة ولا قلّ الإيمان
كان الفراق اللي كتب في جبيني
أطلق عنان الصدق.. كله علشان
أعرف ملامح ما بقا من سنيني
وأهجر طريقٍ كله آلام وأحزان
من أول أنْ ضاق الفضا تحتويني
وأنت احتواءك غير وإحسانك إحسان
وأحيان تجرح قلبي وتشتكيني
وأسابقك بالعذر في كل الأحيان
يغلب حرارة قسوتي برْد ليني
هو في حي يعرفك ما بعد لان؟
عذري معي بأغلى ثمن مشتريني
وصلك يساوي ملك خاتم سليمان
وش غير الأوضاع بينك وبيني؟
أجيك ظميانٍ وأودّعك ظميان
تبغى الصراحة؟ خيّم اليأس فيني
ومات الأمل في مهْده وخاطري شان
ما جا في بالي يوم أبيّح كنيني
لكن يقولون الرجل قلْب ولسان
أدخل على الله كان منتب تبيني
إجهر بها.. وأنا على خبْرك حصان
"مدارات شعبية"