علمٍ لفاني يذوب إله الحصى والحديد
يا ليتني يوم يحدث ماني بنالوجود
لو القضا والقدر في علم رب العبيد
بعض الفجايع تعقّب وشمةٍ فالكبود
والعبرة اللي تكسّر وسط حبل الوريد
جادت بها العين والخافق بحزنه يجود
يا عين هلّ العباير جدّ علمٍ جديد
لو ان كثر البكا والنّوح ما فيه فود
حنّا الحزن ذا حزينه للنّهار الشديد
واليوم حتى الحزن حزنه تعدّى الحدود
الله يجبر عزانا في (محمد وزيد)
ويعوضنا فالحرار معرّبين الجدود
إخواننا اللي لهم فالطيب قسم ورصيد
خيرة عيال القبيله صاملين الزنود
اللي ذبحهم بسيف الغدر ما هو رشيد
في مشهدٍ ما تفكر فيه حتى اليهود
يا الله يا ربي عسى من مات يحسب شهيد
واغفر لهم واجعل المثوى جنان الخلود
"مدارات شعبية"