يا حلوتي صدق المشاعر ثمينه
ادري ولكن من يقدّر ثمنها
ردي معي: ليه الضلوع الدفينه
تعزف على قوس المحاني شجنها؟
قولي معي خل المشاعر سجينه
تحيا.. تموت.. بصدرها اللي سجنها
ولاّ تموت من القهر والغبينه
ولاّ تبوح وبوحها هو كفنها
وانتي لو انتي صدقيني فطينه
قلتي وراها هاجرت عن وطنها
ليه أصبحت طفل فقد والدينه
ومن لطفها ليه اليتيم يحضنها؟!
وليا عقد حزنه ملامح جبينه
وضاقت عليه الأرض باللي سكنها
قلتي هلا لك بالمحاني مدينه
تكفَى عناقيد الحزن صد عنها
يالعنبو هالحزن ثقيل طينه
لا مرّت الفرحه برمحه طعنها
ما للفرح يا وجه الأحزان عينه
انشد زمنها ليه عيا زمنها؟
تظهر وهي طفله يتيمه حزينه
من قبل تولد حزنها محتضنها
ادري واعرف ان المشاعر ثمينه
المشكلة منهو يقدّر ثمنها؟
"مدارات شعبية"