البارحه يوم اكثر الناس نيمي
سجت بي الافكار شرقٍ وتغريب
قافٍ قريته هز قاصي صميمي
حتى لجا بين الضلوع المحاديب
مشعل شكى فرقا الشجاع العديمي
حلال عسرات الأمور المصاعيب
عسى مقره في جنان النعيمي
والله يجيره من سعير اللواهيب
وما فيه واحد يالجبوري مقيمي
الا من بامره تشرق الشمس وتغيب
وكم واحدٍ قبلك شكى مستضيمي
من سوّ وقتٍ فرق الزير وكليب
والموت دربه واضحٍ مستقيمي
ضيفٍ وله في كل يوم معازيب
والعمر يجري مثل جري النسيمي
ويفتر له في كل يومٍ دواليب
والرابح اللي في زمانه فهيمي
يصلي فروض الله ويدرا عن العيب
ينجيه ربه من سموم الجحيمي
يوم اللقا في ساعةٍ ما بها ريب
في ساعة فيها يشيب الفطيمي
وكلٍ بيلقى ما كسب من مكاسيب
"مدارات شعبية"