كانك نويت الصد يازين مسموح
لو كنت مقدر عن فراقك دقايق
الدمع من عيني على الخد مسفوح
والنار تشعل في ضميري حرايق
وأحييت ليلي بالتناهيت والنوح
وبيحت مكنوني لكل الخلايق
من ضيقتي خطرٍ أناديك وأبوح
وأقول لك ماني على البعد طايق
لا شك ما في عالي الصوت مصلوح
يبين للعذال خافي الحقايق
القلب لك يا سيد البيض.. مفتوح
وحطيت به عن حب غيرك عوايق
وبنيت لك في قلبي بيوت واصروح
ما غيرك من الناس للقلب.. لايق
اشتاق لك يا غاية القلب والروح
وأحس كل الكون لا غبت.. ضايق
"مدارات شعبية"