يا طيب الرفقة شريف العوايد
ثقلت ظروف الشعر والوقت خانة
يمر بالسبع العجاف الشدايد
اللي هزال الشعر تاكل سمانة
ويعيش لوعات الشقا والنكايد
مدري من اللي عنه شال الحصانه
من قدم الهزل الرخيص وتحايد
عن الجزال بجهل والالعانة
كنه يذوده دون الأخيار ذايد
اللي لهم عقلٍ وثقل ورزانه
للمصلحة علم ونظام وعقايد
ولا عاد للشعر الحقيقي مكانه
صارت لمن سوى القصايد عصايد
اللي يحده قل عرف وسكانه
ما هو يابن فايز مثل ما أنت رايد
على نظام الواسطة والميانه
الناس لو تحسب حساب النقايد
كلٍ تقصر قبل يعلن بيانه
ولو عبقري الشعر شاف الزهايد
ورد السهوم النافذة بالكنانه
قوله ولا ضرب الرهاف الحدايد
لكن عن سوق المخاسير صانه
أبشره لابده العيد عايد
ويرجع لشعر المرجله مهرجانه
الشعر أدب وتراث شعب وبدايد
والله ما نرضى عليه الاهانه
"مدارات شعبية"